شافت حتى اعْيَت وادْوَت
أسيدي تاقن الشغل
اعظامك كاملة تحلّت
وباقي رافد الثقل
شوف ركابيك كيف ملّت
تقطع لوطا والجّبل
وكتافك بارّة اتْصدّت
أُ ظهرك ما ارخى حْمل
المفاصل كلها اترختْ
والأشعة فـ شي شكل
كانت سلعة عاد نزلت
دروك م سوق الغزل
واش أنايَ خاطري بغت
ولا ولدوني بغل
بهيمة بالشركة رضتْ
كعبي مرتاح فـ الكْبُل
راه الدنيا اللي قضت
احْكُمها ما ليه حلّ
مشتْ لهيها ورجْعَتْ
والباقي كلّو فضلْ
راه الجرية إلا احْفت
شي طفّرها وشي احْصل
بحال السلعة إلا بقتْ
اروى وتخيّر واعزل
صابة فـ الگاعة اتشرت
والسواقة بلا عقل
والدنيا رخصَتْ واغلاتْ
تدّي راس المال والفضل
فـ جرّتي قالت الطبيبة
حياتك حالة غريبة
شرْكة وشروطها صعيبة
جابتني بونت وحبل
خلات التايهة قريبة
حكام المير فـ السيبة
قاطع بحسامو الرّيبة
ومحضّر شاهد العقل
إلا أنا جاتني النوبة
مانا من الكابرين فـ الظل
الدنيا شربتها شريبة
نمشي إلا طرحي اكْمل